Tetabale Nikolai Abramovan “Maid”-runole lapsed tegiba mul’tfil’man
Petroskoin školas-internatas №24 radab ”ČIPSi”-mul’tstudii, kus openikad opendajiden ohjandusel tegeba mul’tfil’moid, iče änetaba da pirdaba niiden täht kuvid. Kaikuččel vodel eloho todenzoittas uz’ projekt. Necil vodel studijan ohjandajad Natalja Spiridonova i Jelena Fedulova tundištoitiba lapsid vepsläižen runoilijan Nikolai Abramovan sädandradonke. Muga läksi eloho uz’ “Maid”-mul’tfil’m, avtoran runole.
— Karjalas om äi lahjakahid ristituid, kudambiden sädandradon kal’t voib tundištoitta meiden lapsid mirunke ümbri meiš. No meiden lapsed ei voigoi el’geta jügedoid tedoid. Nikolai Abramovan runod oma jogapäiväližes elos, armastuses kodimaha, vanhembihe, pert’he — nened temad oma sel’ktad i kebnad lapsiden täht. Nacein, hö ei el’gekoi kaikuttušt rived, no el’gendaba runon jüvän, i nece om tarbhašt meiden täht, sanui augotižklassoiden opendai Jelena Fedulova.
Mul’tfil’man prezentacii mäni openduzvoden lopus literaturvastusel, miččele kuctihe Nikolajan plem’annikad Dmitrii Fedotovad.
— Dmitrii starinoiči vepsläižen runoilijan elos da rados, siš, kut Nikolai tuli Karjalaha. Lapsed pagištoitiba händast. Sen ližaks Dmitrii abuti meile änetada mul’tfil’man, se kaikile lujas tuli mel’he, sanui opendai-logoped Natalja Spiridonova.
Teravas mul’tfil’m voib kacta Petroskoin školan-internatan №24 saital. 0+
Tarkištele "Oma Median" MAX-kanalad!
