Termišt-orfografižen komissijan vastuz
15. sulakud Periodika-paindišton Sebruden pertiš oli vedetud Termišt-orfografižen komissijan vastuz. Komissijan radnikad pagižiba tehtud radon polhe. Männudes vodes oli tehtud sur’ rad – karjalan da vepsän kelele oli kätud enamb 2000 erazvuittušt virkeht da nimitest. Niiden keskes oma informacijan materialad deputatoiden polhe, valdkundaližiden da municipaližiden pertiden da üksnäižradištoiden nimed.
— Termišt-orfografine komissii ičeze aigas vaumiči metodižed nevondad karjalan da vepsän kändajiden täht. Petroskoin enamb 1300 irdoiden nimed om kätud karjalan kelen livvin paginaha. Vepsän kel’he oli kätud Šokš-posadan irdoiden nimed da teznamad Babarmujuižen kvarcitan etnoparkas, sanub Karjalan Rahvahaližen da regionaližen politikan ministerstvan radnik Aleksandra Anufrijeva.
Vastusel pagištihe planoiš-ki tulijaks vodeks. Nügüd’ vaumitas udištadud da ližatud venä-vepsläine vajehnik. Necen radon tegeba filologijan tedodoktor Nina Zaiceva da tedokandidat Ol’ga Žukova.
