Piterin agjan Pöudos mäni fol’klorine koncert, kus lidnan eläjid tundištoittihe vepsän kul’turanke. Koncertal eziniba kaks’ lapsiden kollektivad – ”Solncecvet” da ”Goricvet”, miččiden ohjandai om Kristina Zadvornova. Pened artistad starinoičiba adivoile vepsän rahvahan elon polhe pajoiš, karguiš da runoiš.
— Lapsed ozutiba teatrezitusen, miččen pohjaze om ottud ”Vepsläižed – pohjoine rahvaz”-starin ”Vepsän kondun starinad”-kirjaspäi. Kacujad voiba nägištada, kut ende vepsläižed käveliba mecha marjoihe da babukoihe, püdiba kalad, semenziba pöudoid, lämbitiba päčid, starinoičeb Kristina Zadvornova.
Tulijoil adivoil oli voimuz kundelta, kut kulub eläb vepsän pagin, ved’ lapsed starinoičiba kaikiš radoiš scenal kodikelel. Sid’-žo tehtihe kändand venän kel’he.
— Lapsed ei mahtkoi pagišta vepsän kelel, no heile om melentartušt opeta kodikel’t. Mö lugem heidenke vepsän kelel, openzim kirjamištod da sanoid vepsän kelel. Erasil heišpäi oma vepsläižed jured, heile om melentartušt teta, kut eliba heiden ezitatad, jatkub Kristina Viktorovna.
Kaik sädod spektaklin täht om tehnu iče Kristina Viktorovna. Hän muloi lopi Vepsän kelen kursid i nügüd’ tundištoitab lapsid vepsän rahvahanke da kul’turanke.
Projekt ”Vepsän kondun starinad” oli tugetud Kul’turtomotusiden prezidentan fondan grantal.