Sordavalas kehitetäh koinnostandutuotanduo
Sordavala nygöi kuuluu ei vaigu turistukohtannu, ga koinnostandutuontandon kehityksen alovehennu. Paikallizel laitoksel ruvetah luadimah kodiloi rungopaneelitehniekän mugah.
Nordverk Gl’u Lam -laitos jo ammui ruadau puuhizien kodiloin luadijoin firmoin joukos. Enzimäzet ruadotilat Sordavalas se luadi vie 10 vuottu tagaperin. Nygöi laitos on valmis kahteh kerdah suurendua tuotanduo. Turistoin luvun kazvamizen periä kyzyttävät ollah terväh nostettavat koit: huogavokohtat, hotellit, gost’upertit.
— Olen sidä mieldy, ku moizii projektoi pidäy kehittiä kaikkiel Karjalas. Puuhizien kodiloin nostandutuotando kehittyy meil ylen ruttoh. Sil alal ruadau setämä verdu laitostu, kudamil on suuri panos tazavallan ekonoumiekkah. Meil on hyviä mieldy, ku Karjalas valmistetut taloit ollah meijän muan parahimil kurortoil, sego Uzbekistanas, Valgoven’al da Suvi-Korejas, kerdou Karjalan tazavallan piämies omassah VK-sivul.
Lyhyös aijas, kolmes kuus, Nordverk Gl’u Lam -laitos nosti endizien ližäkse nygyaigazet ruadotilat omien tehnolougieloin mugah. Karjalan halličuksen tuvel da tazavallan Tevolližuon kehityksen fondan kannatuksel laitos osti nygyaigazen roobottulaittehen, kudamii Ven’al vie ei olluh. Laitoksel on luajittu enämbi kymmendy uuttu ruadosijua. Tänävuon laitos rubieu ruadamah puolel väil, tulien vuon täydeh vägeh.
Nygöi Nordverk Gl’u Lam -laitos pidäy paginua Turtsien kel, kus suuren muanjärähtyksen jälles nostetah kodiloi, niilöin luvus on puuhistu kodii, kuduat ollah kestäjät muanjärähtyksii vastah.
