”Savesine Van’oi”: uz’ ozuteluz avaižihe Kiži-muzejas
4. sügüz’kud Petroskoin Kiži-muzejan fondan varažomas avaitihe uz’ ozuteluz, miččen nimi om ”Savesine Van’oi. Vepsläine savitehmusid vozilpäi 1930—1980”.
Ozutelusen adivoil om voimuz tundištadas Änižröunan vepsläižiden savitegeližuden istorijanke, kundelta melentartuižid starinoid tetaban ”Rusked vepsläine”-artelin polhe da kacta Derev’annoje-külän Änižröunan tegeližen kombinatan XX-voz’sadan savitehmusid.
Ozutelusele om mugažo pandud lahjakahiden nügüd’aigaižiden Karjalan mastariden Julija Guščinan da Roman Leont’evan saviastjoid. Ozutelusen avtorad da sädajad oma L’udmila Trifonova da Uljana Mišina.
Kävujad voiba ei vaiše kacta rahvahaližen elon kaluid, no i tedištada saviastjoiden todesižes kal’hudes i Karjalan saven olendtahoiš.
— Nügüd’ om tarbhašt homaita, kut nene vanhad vepsläižed padad oma ühten aigan üks’kerdaižed da lujas čomakahad, tarkašti kacta neche hillähä čomudehe da el’geta, kut ende arvostadihe jogapäiväšt elod, sanub Uljana Mišina.
Adivoiden täht Kiži-muzejan radnikad mugažo vaumičiba melentartuižen tundištoituzlekcijan saviastjoiden vaumištandan peitusiš da tradicionaližen padapirdandan variantoiš.
Ozutelusen aigan mäneb interaktivine urok ”Sarnad stolan taga”, mitte om omištadud sarnoile da astjoiden rolile niiden tekstoiš. Kaiken ližaks adivoile vedädas padapirdandan mastar’-klass.
”Savesine Van’oi”-ozuteluz ihastoitab ičeze kävujad 10.päivähasai vilukud 2024.
