Sada vuottu Šuojun pohjas virui jauhinkivi nostettih
Syvyskuun puolivälis Karjalan vesselimäs kyläs Šuojun joven pohjaspäi nostettihendizen melličän oza — ylen suuri jauhinkivi. Randah se nostettih jygien tehniekan avul.
— Räkki vihmutoi kezä toi meile hyvän lahjan — meile lykystih nostua Šuojun joven pohjaspäi käzinkivi. Läs sadua vuottu se virui joven pohjas, vaiku toiči ozuttihes vien pannan piäl. Kunzutahto ammui tämä käzinkivi jauhoi jauhuo Kindahan melličäs, saneli Svetlana Hrebtova, Kinnas — Ven’an vesselin kylä -projektan johtai.
Svetlana sanoi, ku jauhinkiveh nähte, kudai viruu joven pohjas, hyö tiettih ammui. Šuojun joven suushäi kunzutahto ammui seizoi melliččy. Sen projektan luadi paikalline muanruadai Kuz’ma Trifonov. Neroniekan keksityn projektan mugah melliččy oli azetettu lautale, min hyvyös se ruadoi rippumattah Šuojun vien pinnan korgevuos.
Läs kuuttu vuottu tagaperin Kindahah kučuttih čukeldujii, kudamat tovestettih, ku jauhinkivi suas vuvves nikunne jovespäi ei hävinnyh.
Svetlana Hrebtova da projektas ruadai Julija Tolmačova piätettih säilyttiä jauhonduneron tulieh polveh niškoi da todevutettih projektan. Muga Kindahah rodih Kindahan kylän vezimelliččy -ozuttelukompleksu. Projektan todevuttamizes avvutettih aktivistat, biznesmiehet da vallas olijat.
— Tahtommo, ku Kindahan melličän histouriedu tiettäs Ven’an kaikin eläjät, i myö sen ruammo!, uskaldettih projektan alguhpanijat.
