Rudolf Toivonen šynty 10. kevätkuuta vuotena 1935 Vuokkiniemeššä. Hiän lopetti Uhtuon koulun 1953 vuotena ta vuoteh 1958 opaštu Leningradin meččäakatemijašša.
Rudolf Trofimovič ruato Jyškyjärven lespromhosissa 1959—1966 vuosina, toimi Kemin rakennušvirašton johtajana 1966—1969 vuosina. Šiitä šiirty elämäh Petroskoih, missä ruato Karellesstroi-yhtymäššä.
Rudolf Toivonen oli peruštehellisena šukututkijana. Hiän rupesi tutkimah omua šukuo vuotena 1997. Karjalan Šivissyššeura on myöntän anšijomerkin Rudolf Trofimovičilla miehen šuurešta panokšešta šukututkimuštyöh.
Šamoin miehen elämäh mahtu runšahašti vapuaehtoistyötä. Rudolf Toivosen alottehešta ta yritykšeštä on ašetettu muistolauvat L’udmila Lukinalla Jyškyjärveššä, Vasselei Kirillovilla Kalevalašša, Veikko Hakulisella Šuomešša, Anani Arhipovilla Lietmajärvellä ta Juakko Rugojevilla Petroskoissa. Šuuremmoisen ta monivuotisen työn tulokšena hiän nošti yleistietoh karjalaisen Olimpijakisojen voittajan, puatenelaisen hiihtäjän F’odor Terentjevin nimen: pačaš hänen hauvalla ta lopputulokšena Muistopačaš Petroskoissa Kurganilla.
— Rudolf oli niitä harvinaisie miehie, ken uškalti ruveta näin šeikkasih ta šuurih hommih, uškalti pakautella vaikka kuin šuurie herroja asien hyväkši ta aina oli huolissah mistänih karjalaisešta jutušta tahi ihmiseštä, muistelou Toivosen työkaveri ta sussieta Valentina Karakina.
Viimeset jiähyväiset Rudolf Toivosella voipi šanuo 1. šyyškuuta Vol'naja-kavun 2. šurušalissa klo 12.00—13.00.