Puhtahat jovet -projekti šai Presidentin šiätijön kannatušta. Šitä ruvetah toteuttamah enši vuotena. Tänä vuotena projektie varoin ečitäh ošallistujie.
– Projektih valitah 50 ihmistä, kumpasie tulijana vuotena makšutta opaššetah matkailuoppahiksi. Hyö ruvetah ošallistumah retkilöih oppahina. Niise 300 ihmistä voit ošallistuo jokimatkoih volont’oriloina, kirjutti projektin šivulla VK-sosialiverkošša šen johtaja Ilja Kosenkov.
Karjalan jovet ollah šuosittuja aktiivisien matkailuretkien pitämisekši. Projektin johtajat valittih šeiččemen jokie Karjalan eri ošissa: Šuoju, Čirkka-Kemi, Pisto, Keret’, Säpsä, Ohta ta Uuksu. Jokahini niistä on kaunis, ka jokahisen joven rannoilla on äijän roškie turistien lepopaikoilla. Mieli šiivota ne pitäy järještyä vesiretki, vet rantua myöten niillä paikoilla ei piäše.
Jokien rantoja ruvettih puhaštamah XX vuosišuan lopušša. Enšin reissuloih ošallissuttih aikuhiset ta nuoret, myöhemmin niih ruvettih kuččumah lapšieki. Tämmöset retket ollah hyvänä mahollisuona nähä Karjalan kaunehie jokie, ošallistuo vesiretkeh ta tuuvva luonnolla äijän hyötyö. Lisyä tietuo löyvät VKontakte-ryhmäštä.