Piärunuo ečimäs: karjalazien runoloin päivässäh pietäh luomiskilbua
Karjalan Ystävyystalo ilmoitti Piärunuo ečimäs -kilvan alluspäi. Ottua ozua sih voijah iččenäzet luadijat, segoi kogo perehet yhtes. Luomiskilbu sovittau Karjalazien runoloin päiväh da sidä pietäh Ven’an kanzoin yhtenäžyon vuvvel. Ozanottajile kehoitetah ellendiä uvvelleh runoloin merkičysty nygyaijas da kaččuo niilöih omil silmil.
Kilvas on kolme kategouriedu: ristikanzan da luonnon yhtehsobu, syväinmieron kuvastus da sugupolvien yhtyvys karjalazis runolois. Ohjailijat vuotetah lyhyzii piirdofilmoi, videoloi, ezittelylöi, kirjutuksii, säveldysoppiloi, perehien luomisruadoloi, foto- da piirroskuvii. Kilvas on tärgei ehto: ei sua ottua omih ruadoloih niškoi Kalevalan kogo muailman kuulužan karjalan rahvahan eeposan runoloi.
— Kučuimmo Karjalan tazavallan eläjii — lapsii, nuorii, vahnembahizii da perehii — pidiä iččie karjalazien runoloin mualmas da ozuttua sidä luomisruavon avul, on sanottu Ystävyystalon VK-sivul.
Kilbupakičuksii voi työndiä 26. päivässäh sulakuudu sähköpočtan kautti. Sen ližäkse pidäy täyttiä ozanottajien kilvulistu.
Diplomat da mustopalkindot vuotetah voittajii da palkindonsuannuzii. Kaikki ozanottajispäi suahah sertifikuatoi.
Ystävyystalo da Periodika-kniigupainamo ollah kilvan ohjailijoinnu da sidä kannattau Kanzallizen da alovehellizen poliitiekan ministersvu.
Aihies voit lugie vepsäkse da suomeksegi.
Yhty Oman Median kanualah Telegramas!
