Petroskoi: uuzi ozuttelu lapsile da lapsih nähte
Uuzi ozuttelu lapsih nähte avattih Petroskoin linnan ozutteluzualas. Uuzi projektu on omistettu lapsen muailmale da hänen ajatustavale. Ozuttelu rubieu ruadamah kezäkuun 7. päiväh suate.
Äijäle ristikanzale lapsusaigu on suarnalline hetki. Se on huoletoi aigu da kaunis muailmu, kudamas myö olimmo toizenmoizinnu. Kaikkeh sih nähte opittih sanella taidoilijat ozuttelun avajazis. Ozutteluh, yhteh kohtah, on kerätty gruafiekkua, mualuamis-, kuvanvestotevostu da dekoratiivistu taiduo.
Ozuttelus voibi nähtä läs 130 luomisruaduo, niilöi luajittih neroniekat Suures Novgorodas, Krasnodaras, Moskovas, Piiteris, Anukses da äijis toizis linnois. Ozuttelus on petroskoilaziengi taidoilijoin ruaduo.
— Myö luajiimmo tädä ozutteluu kaksi vuottu. Tämä aihe on tärgei meile, sendäh gu kai ozuttelun luadijat ollah nuoret muamat. Meijän mieles, se rodieu ylen hyvä ozuttelu, sanoi Oma Mediale ozuttelun pidäi Julija Korosova.
Ozuttelun avajazih kerävyi äijy rahvastu. Heidy vuotti pieni kul’tuuruprogrammu. Sen ližäkse ozuttelun luadijat saneltih omis ruadolois da sih nähte, mittuine piätarkoitus on nengozil ozutteluloil.
Ozutteluh voibi kävvä perehinneh da tiettäväine ottua kerale lapsii. Heih niškoi on luajittu oma elostuskohtu.
Yhty Oman Median kanualah MAX:as!
