Petroskoi: paginal pohjaisalovehien kehitys
Ven’an luodehpuolen Arktiekkah kuulujien alovehien sotsio-ekonoumielline kehitys on paginal Arktiekku on meijän yhtehine kodi -fourumal. Sidä pietäh Petroskois kahten päivän aloh. Pidoh kerdyi federuallizien da alovehellizien valdivoelimien edustajua, Ven’an da ulgomualoin tutkijua, biznesmiesty da yliopastujua.
— Karjalan eläjien viijes vuitti eläy da ruadau tazavallan Arktiekkah kuulujis piirilöis da piäruado on luadie muga, ku nuoret ei lähtiettäs toizih kohtih, tahtottas ruadua, kazvattua lapsii omal mual, kerdou Zakonoinhyväksyndykerähmön piälikön sanoi Karjalan piämiehen lehtistöpalvelu.
Arktiekan mualoih kuuluu tazavallan 40% pindualua, sie eläy 97 tuhattu hengie. Karjalas nygöi Arktiekan alovehil todevutetah projektoi, kudamih käytetäh lähes 106 miljardua rubl’lua, niilöin loppiettuu rodieu läs 2,5 tuhattu uuttu ruadokohtua. Karjalan piämiehen kehoitukses haldivo työndi federuallizeh keskukseh omii kehoituksii, kuduat koskietah Arktiekan alovehen kehittämisty. Niilöin luvus on Termal-Kemi -perehkurortan rakendamine, luonnonguazun suandu pohjazeh Volhov-Murmansk-guazubutken luadimal, Arktiekan lapset -programman levendämine, ku sih kuuluttas kai 1.—8. kluasoin opastujat da tostu kehoitustu.
Fouruman ruadoh yhtyi Kitain, Indien da Itaalien tiedomiesty. Tänäpäi yliopastujien ies ezittyy Ven’an ulgoazieloin ministerstvan edustajua da kučuttuu ekspertua, kuduat šeikuijah Yhtysvalloin arktiekkustrateegiedu da toizii tärgielöi kyzymyksii.
Yhty Oman Median kanualah MAX:as!
