Petroskoiš ozutihe uz’ kirj Karjalan rahvahiden sömižiden receptoidenke
Petroskoiš ozutihe uz’ kirj Karjalan rahvahiden sömižiden receptoidenke. Kirj läksi eloho “Baltianmeren suomalaižiden rahvahiden ligan” “Karel’skaja kuhn’a i Točka” -projektan abul. Se oli rahatugetud Karjalan pämehen grantoiden fondal.
Kirjan vaumičendan aigan oli tehtud ekspedicijad Karjaladme. Niiden taguiči sijaližil eläjilpäi oli kirjutadud 120 receptad, kuvatud 30 videorolikad da tehtud tuhid fotoid. 50 parahint receptad mülüi udehe kirjaha.
— Laps’aigal kaikuččen pühäpäivän minun baboi paštoi pirgoid. Minun uništusen oli kaita ezitatoiden receptoid. En usko, miše nece uništuz tuli eloho. Panim kirjaha vaumištadud sömižiden fotoid. Konz kacud kuvaha, ka sündub taht ladida keitta vai paštta iče, sanub projektan ohjandai Anna Anhimova.
— Projektan taguiči oleskelin Karjalan küliš, miččiš en olend olnu sihesai. Ende meletin, miše “oiktad”, ozutesikš, kalitkad pašttas muga, kut pašttihe minun perehes. Nügüd’ minä el’gendan, miše kaikuččes perehes voiba olda receptoiden ičeze erigoičusid. I nece om lujas melentartuš! – ližadab projektan ühtnik, Kinerma -külän kaičii, Nadežda Kalmikova.
Uden kirjan tiraž om 500 ekzempl’arad. Tahtnikoid sada mugoižen kirjan ičeleze om lujas äi. Sikš sen tegijad vaumištiba kirjan elektronižen versijan, mittušt pigai voib löuta “Kiži” -muzejan oficialižel lehtpolel da “Baltianmeren suomalaižiden rahvahiden ligan” -gruppas.
Uzišt neciš temas voib lugeda mugažo karjalaks.
Tarkištele "Oma Median" MAX-kanalad!
