Petroskoi: Kaupunkin päiväkši korjatah oša rantakatuo
Nykyjäh korjatah rantakavun ošua rotundašta Leninin valtakavun šuuntaušlinjah šuaten. Vanhan piällyššykšen tilah šiih pannah uušie graniittilevyjä. Kivie šuahuššetah Kontupohjan ta Puudožin piiristä, ilmottau Karjalan tašavallan piämiehen lehistöpalvelu.
— Projektie toteutetah BIOEN-yhtijön sponsoriavun anšijošta. Vuotena 2024 tašavallan halličuš ta moskovalaini partn’ori šolmittih šopimuš Karjalan graniittimurun kuletukšeh, kerrotah tiijotukšešša.
Neuvottelun aikana alovehen piämieš Artur tapasi yhtijön johtajan kera ta tarkašti, mitein korjauštyöt eissytäh.
— Himottau, jotta meijän rantakavun korissukšena käytettäis alkuperäistä kivie, mistä Karjalaon tunnettu, šano piämieš omalla lehistöpalvelulla.
— Meijän moskovalaisilla partn’oriloilla on šuuri kokemuš rakentamisešša, rupiemma ottamah šitä huomijoh. Kiitän BIOEN-yhtijyö, kumpani on valmis antamah ošan omašta tulošta Petroskoin rantakavun rakentamiseh, tunnollisešta sosialiratkaisušta.
Artur Parfenčikov korošti, jotta Kaupunkin päiväkši Petroskoin eläjät ta vierahat nähäh oša uuvvissettuo rantakatuo. Yhtijön johtaja Oleg Maksimov vakuutti, jotta Kaupunkin päiväkši rantakavun korjaukšen enšimmäini vaihe piättyy.
Šamoin neuvottelun ošallistujat käsiteltih rantakavun valotukšen modernisointua ta vuapukanvärisen kvartsiitin šäilyttämistä.
Aihiešta voit lukie niise šuomekši.
Yhty Oman Median MAX-kanalah!
