“Periodika”-painišt jatktab painda lehtesed da kulehtesed karjalan, vepsän i suomen kelil
Lehtesed da kulehtesed karjalan, vepsän i suomen kelil jatktas painda “Periodikas”. Neciš “Oma media” -portalale sanub painišon ohjandaikund.
— Olem ihastusiš, miše rahoitusehe sidotud küzund pigai pättihe. Kitäm kaik organizacijoid, miččed abutiba necen jügedusen pätandas. Meiden toimištod radaškandeba enččikš. “Periodika”-painišt jatktab painda lehtesed da kulehtesed karjalan, vepsän da suomen kelil. Kitäm lugijoid i rahvazkundad holes da tuges, kommentirui portalale “Periodika”-painišton pämez’ Natalja Sinickaja.
23.redukud, “Periodika”-painišt tedoti, miše toižel nedalil lehtesed da kulehtesed ei lähtkoi eloho, niiden painand om seižutadud.
Oficialižešti neciš situacijas tedotadihe lehtesiden da kulehtesiden sädajid – Karjalan Valdmehištod, Karjalan zakonoiden tegemižen kundad, Karjalan opendusen da sportan, rahvahaližen da regionaližen politikan ministerstvoid, “Karjalan rahvahan sebrad” da mugažo Karjalan Roskomnadzorad.
“Periodika”-painišt oli sätud vodel 1991 karjalan-, vepsän-, suomenkeližiden lehtesiden pästandan täht. Painištos radab viž toimištod: “Karjalan Sanomat”, “Oma mua”, “Kodima” -lehtesed, “Carelia” da “Kipinä” -kulehtesed. Zavottes vodelpäi 1998 painišt pästab eloho kirjoid-ki.
