“Periodika” ühtneb “Vepsläine garmonija” -festivalihe Kiži-sarel
“Vepsläine garmonija” -festival’ mäneb Kiži-sarel ezmäižen kerdan. Sen programmas om äi erazvuiččid azjtegoid, miččed tundištoitaba adivoid vepsläižiden käzitöidenke, muzikanke, tradicijoidenke, kelenke.
— Vepsän rahvaz om vähäluguine, no se eläb kožmuses. Vepsläižil om lujas bohat kul’tur. Pidab tehta kaiken, miše kaita sidä, sanub “Kiži”-muzejan pämez’ Jelena Bogdanova.
Tämbei Kiži”-muzejan fol’kloransambl’ ezitab pragramman, miččes ozutadab vepsläižid tradicijoid da veroid. Festivalile tuli Vepsän rahvahan hor-ki, miččele täl vodel täudub 90 vot. Mastarid ezitaba ičeze tehmusid da tarjoičeba festivalin adivoile ühtneda mastar’-klassoihe. “Periodika”-painišt toi festivalile ičeze kirjoid vepsän, karjalan da venän kelil.
“Vepsläine garmonija” -festival’ zavodihe völ egläi. Siloi sen adivoile tehtihe ekskursii “Kiži”-sartme. Sid’ mäni vastuz tedomehenke Zinaida Strogalščivanke, kudambad starinoiči vepsläižiden kül’turjäl’gestuses. Lopihe festivalin ezmäine päiv “Vepsläine neižne” - Karjalan rahvahaližen teatran spektaklin ozutandal.
Tarkištele "Oma Median" MAX-kanalad!
