Pauli Rinne. Näyttämö ta elämä -kirja on esitetty Petroskoissa
Muusikko, kirjuttaja, toimittaja ta kiäntäjä Arto Rinne esitti oman tuaton kohtalolla omissetun kirjan “Pauli Rinne. Näyttämö ta elämä”.
Kirjan esittely piettih Karjalan kanšallisešša musejošša ta še alko Sattuma-ryhmän šoittajien esitykšeštä. Salih keräyty kirjailijan yštävie ta hyvie tuttavie, kollegoja — ne, kenellä on mukava näyttelijän ta ohjuajan Pauli Rintehen kohtalo ta perehen istorija.
Kirjan pohjana on muisselmie, arhiivatietoja, kertomukšie, pakautteluja ta vanhoja valokuvie. Niitä käyttyän Arto kertou Karjalan tunnetun näyttelijän ta ohjuajan Pauli Rintehen elämän tapahtumista, hänen šuvušta, pereheštä, kohtalošta.
— Tämä kirja on kolmaš miun kirjuttama kirja. Enšimmäini oli omissettu Paulin isintimällä Onnilla ta še oli julkaistu käsikurjutukšen kilpailun anšijošta šuomekši ta venäjäkši. Šiitä oli kirja “Karjalaan kaikonneita” šuomen kielellä. Kirjašša pereheistorijan rinnalla kerron 1930-vuosien tapahtumista, kumpaset hyvin vaikutettih vanhempien ta isovanhempien kohtaloih. Mie kiännin kirjan tekstin venäjäkši. Viime vuotena tuattoni Pauli Rinne kuoli. Mie lisäsin kirjah valokuvie ta muisselmie Paulista, kumpaset miula kerrottih hänen yštävät ta työkaverit ta šemmosena uuši kirja oli julkaistu Petroskoissa, šano kirjan luatija Arto Rinne.
Perehistorijašša oli äijän tragedijoita ta vaikeukšie, ka ne ei häiritty jiähä ahkerina, luovina, hyvänšiämisinä ihmisinä.
Pauli Rinne oli Petroskoin Šuomelaisen teatterin yhtenä parahimmista näyttelijöistä ta oliki šen taiteilijajohtajana ta ohjuajana, ošallistu filmien kuvaukših, oli Manok-lauluyhtyvehen jäšenenä.
Kirjan luatija Arto Rinne on radiotoimittaja, kiäntäjä ta tunnettu folk- ta folk-rockmusiikin šoittaja, Myllärit, Sattuma, Santtu Karhu & Talvisovat, Toive -ryhmien ta yhtyvehien solisti.
