Uz’ ambulatorii zavottihe leta Šoutjärves muloi kezal. Tämbei siš jo ottas läžujid Šoutjärvespäi da Kalagespäi. Ambulatorii om letud nügüdläižiden tehnologijoiden mödhe, täs om kaik tarbhaine kodvuz’- da tervhuz’kaludišt.
Ambulatorii om jagetud koumehe erištoho: lapsiden, aigvoččiden täht da ezmäižen abun erišt. Joga erištoho om eriži päzundverai.
— Ambulatorii om sur’ i kodikaz, eriži oma kabinetad lapsiden i aigvoččiden täht. Joga päivän radaba terapevt i lapsenlekar’, kaikuččes honuses om uz’ oborudovanii i kaludišt. Eskai om vändhonuz’ lapsiden täht, kus hö voiba pirta da väta. Nügüd’ tuled udehe ambulatorijaha kuti lidnan läžundpertihe, sanub Šoutjärven eläi Ales’a Anušenkova.
Ambulatorijas om ezmäižen abun erišt, kus radab nel’l’ brigadad. Täs ottas läžujid miččel taht päivän aigal. Neciš azjas abutab uz’ ezmäižen abun mašin, mitte anttihe küläle. Päiväs tervhuz’abud sab läz kahtkümned mest.