Oma Media: kaks’ vot Internetas
Tämbei 23.sügüz’kud täudui kaks’vot, kut ”Periodika”-paindištos zavodi rata ”Oma Media”-portal. Kahdes vodes portalal om paindud läz 4500 uzištod i enamb 550 kirjutest. Portalal voib lugeda uzištoid da kirjutesid suomen, karjalan da vepsän kelil. Necen voden augotišespäi sil mugažo voib lugeda materialoid venän kelel.
— Venän kelen ližapalan avaiduz om necen voden üks’ tärktembiš satusišpäi. Sen abul mö voim starinoita uzištoid meiden valdkundan karjalaižiš, vepsläižiš da suomaližiš mugažo venäkeližile lugijoile, sanub ”Periodika”-paindišton pämez’ Natalja Sinickaja.
Sikš ku erased uzištod om paindud magažo rahvahaližil kelil, niid voib kävutada kodikelen urokoil-ki.
— Olem andanuded mugoižen voimusen kodikelen opendajile, sanub portalan päohjandai Mikko Nezvickii.
Läheližel aigal planuitas avaita uzid ližapaloid.
— Tahtoim avaita ”Oma Radio”-ližapalan, kus lugijad voižiba kundelta podkasoid. Nügüd’ mö vaumičem melentartuižid materialoid necen ližapalan täht, starinoiči Sinickaja.
Uzištoid neciš temas voib lugeda mugažo karjalan da suomen kelil.
