Šokš om vanh vepsläine külä, kus pagištas vepsän kelel i kaitas vepsän rahvahan tradicijoid. Sigä vedetas praznikoid, festivalid, miččed om oigetud kodikelen i kul’turan kaičendaha da kehitoitandaha. Lapsed hüviš meliš opendaba vepsän kel’t, ühtneba erazvuiččihe konkursoihe, projektoihe. Šokšun škol om üks’ nelläs školaspäi, kus opetas vepsän kel’t.
Redukuspäi Šokšun školha tuli radmaha uz’ vepsän kelen opendai Gleb Jurjevič Fomin. Täl vodel hän lopi Petroskoin universitetan Baltianmeren-suomaližiden keliden kafedran i päti ajada külähä, miše opeta lapsid kodikel’he.
– Minei om mel’he rata školas, vedäda vepsän kel’en urokoid. Nägub, miše lapsil om melentartuz kodikel’he i nece ihastoitab mindai, sanub vepsän kelen opendai Gleb Fomin.
Šokšun školas kodikel’t opetas ezmäižespäi ühtendehetoštkümnendehesai klassahasai. Vepsän kelen urokad mäneba vaiše kerdan nedališ kaikuččes klassas. Gleb Fomin opendab vepsän kel’t 5.-10. klassahasai. Augotižškolas vepsän kel’t opendab Jevgenia Mihailovna P’antukova.