Joga voden Šokšun školas pidetas nedalid openduzpredmetoiden mödhe. Kaik nece tehtas sen täht, miše mel’dütoitta openikoid navedimha školurokoid. Nügüd’ mäneb vepsän kelen nedal’, miččen aigan tehtas erazvuiččid melentartuižid azjoid vepsän kelel.
— Mö tegem erazvuiččid konkursoid, vändoid, kvizoid, miččed om sidotud vepsän rahvahan kul’turanke, tradicijoidenke. Školkeskustan lapsed kacuba fil’moid vepsän kelel. Nügüd’ meil radab projekt, miččen aigan tegem mul’tfil’man vepsän kelel. Lapsed surel tahtol ühtneba kaikihe nenihe azjoihe, kävutaba kodikel’t praktikal, sanub vepsän kelen opendai Gleb Fomin.
Mugažo vepsän kelen nedalil tehtas mastar’-klassoid openikoiden täht.
— Lapsed vaumičiba vepsän emägust — sul’čnid. Openikoile oli lujas mel’he tehta niid vepsän receptan mödhe. Mastar’-klassan jäl’ghe kaik, ked tegiba pirgoid, söiba magukahid sul’čnid čajunke, starinoičeb školan pämez’ Nina Koren’kova.
Augotižškolan da vanhembiden klassoiden openikoiden täht om tehtud ičeze programm. Sädajad oma sidä mel’t, miše kaik nece abutab lapsile süveta vepsläižiden miruhu, mel’dütoitta lapsid navedimha kodikel’t.