Nuoriso on muutokšien kynnykšellä
Mari El -tašavallan piäkaupunkissa Joškar-Olašša jatkuu III šuomelais-ugrilaisien kanšojen forumi. Tänä vuotena šen teemana on nuoriso muuttujašša muailmašša.
Juhlalliset avajaiset piettih 10. šyyškuuta Oopperan ta baletin teatterissa. Marilaiset kollektiivit esitettih luova ohjelma, kumpani tanššin ta laulun avulla kerto, kuin näillä mailla kanšat ruvettih elämäh.
Šen jälkeh lavalla noššettih forumin kunnivovierahat: Venäjän presidentin hallinnon johtajan šijahini Magomedsalam Magomedov, Venäjän presidentin täyšivaltani etuštaja Volganrannan federalisešša piirissä Igor’ Komarov, Venäjän liittoneuvošton puhienjohtajan šijahini Konstantin Kosač’ov, Kanšallisukšien aseijen federalisen toimiston johtaja Igor’ Barinov, Valtijollisen duuman komitietan puhienjohtaja Vladimir Ivanov, Mari El -tašavallan piämieš Juri Zaitsev ta Venäjän šuomelais-ugrilaisien kanšojen liiton neuvošton puhienjohtaja P’otr Tultajev.
Avajaisissa oli luvettu Venäjän presidentin tervehyššanat.
— Tilaisukšien kyšymykšien keškukšešša on kyšymykšie kašvajan šukupolven kašvattamisešta, nuorison tulovaisuošta, mahollisukšista noštua ammatillisie taitoja ta kehittyä luovua kokemušta. Koroššan, kuin tärkietä ruatuo šuorittau Venäjän šuomelais-ugrilaisien kanšojen liitto monen vuuvven aikana. Šen ruavon tehtävänä on šäilyttyä šuomelais-ugrilaisie kielie ta ainutluatusie tapoja, kannattua tarvittavie etnokulttuuri-, opaššuš- ta taitoprojektija, oli luvettu presidentin hyvittelyt forumin jäšenillä.
Forumin ruato mänöy kolmešša ošašša, missä ošallistujilla on mahollisuš näyttyä oman ruavon tulokšie ta šuaha uutta kokemušta.
Forumih ošallistuu 250 henkie 32 Venäjän ošašta.
