Natalia Silakovan radod korktas arvostadihe Karjalas
Vepsän kul’tursebran da Venäman kirjutajiden sebran ühtnikale Natalia Silakovale anttihe Karjalan Valdkundan Pämehen arvznam ”Panendas Karjalan Valdkundan kehitoitandaha”, a mugažo sures panendas sijaližen valdelimen kehitoitandaha Karjalan mal.
Vodelpäi 2017 Natalia Silakova oli Kalagen külän pämehen, vodelpäi 2022 — Čalnan külän pämehen. Hänen abul eloho oli todenzoittud äi tärktoid projektoid, miččed oli oigetud infrastrukturan paremboitusehe, küliden etnokul’turižehe kehitoitandaha.
— Olen ihastusiš sada mugoižen znamasižen pauklahjan. Om mel’he, miše oli ottud homaičusehe sur’ rad, mitte oli tehtud Kalages. Kaik meled ozastui todenzoitta eloho vaiše ühthižvägel. Kitän Vepsän kul’tursebrad, eläjid, radištoiden pämehid – kaikid, ked abutiba i ühtniba “Kalarand”-etnoparkan, muštpachoiden tegemižehe. Päaz’ om konz ristitud voiba ladidas i ühtes rata ičeze valdkundan, penen külän da eläjiden hüvüdeks, sanub Vepsän kul’tursebran ühtnik Natalia Silaova.
Johtutam, Natalia Silakovan abul Kalages oli sätud “Kalarand”-etnopark i joga voden sigä vedetas vepsläine tradicionaline praznik sil-žo nimel.
Tarkištele "Oma Median" MAX-kanalad!
