Matrosan vuozipäiväkse on painettu kniigu
Elokuun 17. päivänny Priäžän piirin Matrosas pietäh suuri pruazniekku. Kylä täyttäy 200 vuottu. Kylän eläjih da gostih niškoi pruazniekan järjestäjät varustettih äijän mieldykiinnittäjiä piduo. Piälimäzekse lahjakse rodieu kodvan vuotettavu kniigu “Matrosi. Doroga dlinnoju v dva veka” (kar. “Matrossu, kahten vuozisuan pitky taival”).
Vereksel painettu kniigu kerdou kylän histouries da eläjis. Kniigan perustehes on kylän eläjien mustelmii, kudamii täytetäh arhiivoin da vahnoin lehtilöin materjualat, istouriekoin tutkimukset.
— Kniigu on jo painettu. Pidäy vaiku yhtistiä kanzi da sivut. Tuliel nedälil se tuvvah Matrossah. Myö kiitämmö ruavos julguajua Braudze Mihailua, kudai ottihes täh projektah kaččomattah tehniekku- da den’guvaigevuksih. Häi otti vastah kai meijän toivomukset, hyväh luadussah oppi “vedellä” vahnat fotoportrietat, häi on pannuh ruadoh ei vaiku oman hengen, ga omat varatgi. Konzu kniigu rodieu valmis da tulou Matrossah, rodieu sen prezentatsii, kudamah kučutah kaikkii, ket yhtyttih sen luajindah. Prezentatsien päiväs da aijas roih sanottu myöhembi, kirjutti tänäpäi TOS “Starije Matrosi” -VK-sivu.
Matrosan kylä vahneni kerras 48 vuvvel. Muga ruttoh kylän igälangu pitkeni uuzien tiedoloin hyvyös, kudamat lövvettih kirikkökniigois Kielen, literatuuran da histourien instituutan kieliozaston vahnin tiedoruadai Irma Mullonen da kodialovehentiedäi Oleg Petriläinen.
