Mastarid Vidlaspäi ozutiba korktoid satusid ”Pohjoižen kal’huded”-ozutelusel
Moskvas mäni Rahvazkeskeine ”Pohjoižen kal’huded”-ozuteluz-jarmark, miččehe ühtniba Pohjoižen, Sibirin da Edahaižen Päivnouzman igähižiden vähäluguižiden rahvahiden ezitajad 25 regionaspäi. Vepsän rahvahan kul’turanke, tradicijoidenke da elonke Moskvan eläjid da adivoid tundištotiba Vepsän fol’klorkeskusen mastarid Vidlaspäi.
Necil vodel Piterin agjan vepsläižed ezitiba kompozicijan ”Voden aigad”. Se muga hüvin ozuti Priojatjen eläjiden erazvuiččid käzitöid, miše Vidlan mastarid saiba korktan pauklahjan — Gran-prin ”Parahim ekspozicii”-konkursas.
— Nece om studijan mastariden da ühtnikoiden radon satuz kahtes vodes. Ozutelusel mö tegim mugažo mastar’-klassoid, miččil openzim adivoid kudomaha kangazpuil, luneglal, tehmaha tätüižid šlikuišpäi, vöid. Lujas tuli mel’he adivoile rata vanhoil kivil da tehta villad sabiloudaižil, starinoiči ”Kädekaz”-rahvahan studijan pämez’ Tatjana Sergejeva.
Sen ližaks mastarid toiba kodihe toižid korktoid pauklahjoid ičeze rados.
”Pohjoižen kal’huded”-ozuteluz-jarmarkan sädai om Venäman Pohjoižen, Sibirin da Edahaižen Päivnouzman igähižiden vähäluguižiden rahvahiden associacii.
