Lugekat “Kodiman” kezakun nomer!
Eloho läksi “Kodima”-lehtesen kezakun nomer. Keza om praznikoiden aig, sikš neciš lehteses voib lugeda jo ezmäižes tradicionaližes vepsläižes “Elonpu”-praznikas, mitte mäni Piterin agjan Vidlas, i čomas festivališ, mitte oli Kiži-sarel. “Vepsläine garmonii”-festival’ tehtihe ezmäižen kerdan. Sen adivod voiba tundištadas vepsän rahvahan kul’turanke, käzitöidenke, muzikanke, tradicijoidenke da kelenke.
— Petroskoin školan-internatan №24 openikad tegiba mul’tfil’man Nikolai Abramovan “Maid”-runole. Minei oli melentartušt, mikš valitihe nece runo, kut lapsed tundištihe meiden vepsläižen runoilijan sädandradonke, sikš minä vastsimoi “ČIPSi”-mul’tstudijan ohjandajidenke, kudambad radaba školas, i hö starinoičiba minei studijan rados da mul’tfil’man tegemižes, sanub “Oma Media” -portalale “Kodima”-lehtesen pätoimitai Irina Sotnikova.
“Kodima”-lehtesen sebranik Ivan Gul’ajev äjan matkustab. Neciš nomeras voib lugeda hänen matkas Sibirihe i siš, kut hän vastsihe sigä vepsläižidenke.
Mugažo lugijad voiba tedištada, kut mäni ”Muzejiden ö” Šoutjärves, miččed ozutelused radaba nügüd’, mitte om Šoutjärven školan projektan päidei. Kut lapsile, muga aigvoččile-ki tuleba mel’he Nadežda Agapitovan lämäd melentartuižed johtutesed laps’aigas, babas da dedas, kodiküläs.
Tarkištele "Oma Median" MAX-kanalad!
