Lapsiden ezitused “Vepsläine sarn” -festivalil koskiba žürijoukun südäimid
Kalages kahesanden kerdan mäni “Vepsläine sarn” -festival’. Sihe ühtniba vepsläižed Karjalan, Vologdan da Piterin agjan lidnoišpäi i külišpäi.
“Vepsläine sarn” -festival’ udes ühtenezoiti koumen regionan vepsläižid. Kaiked sihe ühtni ühesa kollektivad, niišpäi kahesa voibištelihe vägestuses kahtes nominacijas: “Nügüdläine sarn” da “Tradicionaline sarn”.
— Mikš sarn om? Sikš ku sarnas om rahvahan melevuz’, sarn opendab meid armastamha vanhembid, arvostamha sebranikoid, vägestamha pahut hüvüdel, sanui Karjalan rahvahaližen da regionaližen politikan ministerstvan radnik Jelena Migunova.
Lapsed ozutiba peniš teatrozutelusiš ičeze kodikelen tedoid, artistan mahtoid, vaumištiba sen täht čomid sädoid da dekoracijoid.
— Kaik kollektivad oliba čomad! Oli lujas jüged valita parahimad. Eriži om taht sanuda “Todesižed sebranikad” -kollektivas Kalagespäi. Heil oli nügüdläine ezituz. Nece oli lujas melentartušt! Lapsiden ezitused koskiba meiden südäimid, sanui žürijoukun pämez’ Maria Košeleva.
“Vepsläine sarn” -regionoidenkeskeine festival’ oli tehtud “Vepsän kul’tursebran” “Kul’tur da kel’: tämbei, homen, kaiken” -projektan aigan, miččen tugezi Karjalan pämehen grantoiden fondal. Mugažo sen tegemižes abutiba Kalagen škol, “Periodika”-paindišt da Karjalan rahvahaližen da regionaližen politikan ministerstv.
