Kalugan agjas ”Etnomir”-park-muzejan pohjal rahvazkeskeižen ”Mö olem Venäma”-projektan todenzoitusen aigan radoi lager’ ”Arktikan lahjakahad lapsed”. Lagerihe ühtni läz 150 last Venäman 13 agjaspäi. Karjalad ezitiba nel’l’ openikad Kalagen da Šoutjärven školišpäi.
— Programm lapsiden täht oli täuz’ i melentartuine. Oli tehtud äi tundištotuzmatkoid, mastar’-klassoid, kel’openduzčasuid, flešmobid, konkursoid, vastusid tetabidenke ristituidenke. Meiden lapsed ezitiba ičeze pen’t vepsän rahvast i ozutiba sen bohatad kul’turad, eziniba scenal vepsläižiš södoiš, pajatiba pajoid, a völ openziba sebranikoid ičeze kodikel’he. Lapsil oli čoma voimuz tundištadas toižiden-ki rahvahidenke da niiden kul’turanke, nece om lujas hüvä, sanub Kalagen školan opendai, lapsiden satai Jekaterina Jer’omina.
Lapsed Karjalaspäi ühtneba neche programmaha 2018. vodespäi Karjalan rahvahaližen da regionaližen politikan ministerstvan tugele. Projektan pätegend om tugeta lahjakahid lapsid, kudambad oma Pohjoižen igähižiden rahvahiden ezitajad, a mugažo neniden rahvahiden kul’turiden da tradicijoiden kaičend da popul’arizoitand.