Uz’ Natalja Silakovan ”Nel’l’ dölod”-kirj nügüd’ om audioformatas-ki. Sarnad neciš kirjaspäi lugiba än’heze kundlijoiden täht vepsläižed aktivistad, lehtmehed, vepsläižiden školiden openikad da opendajad.
― Kirj ei ole sur’, no sil om čoma südäimišt. Sinna om keradud erazvuiččed melentartuižed sarnad, miččid minä konz-se kulištin minun baban suspäi, a nügüd’ panin bumagale, sanub Natalja Silakova.
”Nel’l’ dölod”-kirj paindihe männudel vodel ”Periodika”-paindištos. Audiokirj om tehtud ”Kalarand”-projektan aigan.