Läksi eloho “Kodiman” semendkun nomer
Eloho läksi “Kodima”-lehtesen semendkun nomer. Venämal semendku om Vägestusen ku, sikš lehtesen materialoiden pala om omištadud Surele Voinale, veteranoile, voinrunotusele i m. e. Täl vodel “Kodima” starinoičeb ičeze lugijoile Nikolai F’odorovič Fominan, voinlapsen, elon polhe. Lugijad tedištaba, mitte oli jogapäiväine elo voinan aigan, miččid tundmusid oli prihaižel, kudamban tat vojui frontal.
— Mugažo udes nomeras om čoma kirjutez nügüd’aigaižes voingerojas, specialižen voinoperacijan ühtnikas, kudamb koli frontal. Nece oli vepsläine mez’ Valerii Jevgenjevič Ždanovič — hüvä mužik da tat, lahjakaz pusep, londusen navedii, sanub “Oma Media” -portalale “Kodima”-lehtesen pätoimitai Irina Sotnikova.
Semendkun nomeras om äi opendusen uzištoid. Gleb Fomin tegihe parahimaks kodikelen opendajaks “Karjalan voden opendai — 2026” -konkursas. Vepsän kelen opendai Šoutjärvespäi Anastasia Jevtušenko ühtni vastusehe, miččen vedi Venäman pämez’ Vladimir Putin “Tedo. Ezmäižed” -tedotelendmarafonal Moskvas, hän kucui prezidentad adivoihe vepsläižidennoks. Sulakus mäni jogavozne akcii — “Diktant karjalan da vepsän kelil”, sihe ühtniba Petroskoin da toižiden-ki Karjalan lidnoiden i küliden eläjad.
Semendkus Nina Zaicevale, vepsän kirjkelen sädajale, täudub 80 vot. Sikš znamasižeks päivmäraks Riho Grünthal vaumišti čoman materialan.
Mugažo udes nomeras: kut vepsän mal kuvatihe indialaine fil’m, kut mäni vepsän kelen kursiden vastuz “Kaičei”-sebran adivoiš, kut Suomalaiž-ugrilaižes školas mäni Vepsän da karjalan keliden nedal’.
Tarkištele "Oma Median" MAX-kanalad!
