Elokuun 1.—8. päivinä Priozerskissa piettih 8. Muailman meštaruš. Karjalan kyykkä-peluaja Žanna Tikkanen esiinty niissä Venäjän piäjoukošša ta näytti hyvie tulokšie. Niise še, jotta Žanna oli kučuttu muailman kilpailuh on monivuotisen ruavon tuloš.
— Jotta piäššä täman vuuvven meštaruoh mie kahen vuuvven aikana esiinnyin Venäjän ta Luoteis-ošan kilpailuissa ta olin voittajien luvušša, šano Žanna Tikkanen.
Tänä vuotena Žanna näytti šamoja tulokšie, kuin viimesissä MM-kilpailuissa Šakšašša, ka kilpailla oli tietyšti vaikiempi, vet’ joka peluajan nero kašvau. Enšimmäisenä voimien kuot’t’elukšena oli piäššä Venäjän piäjoukkoh. Šiitä piäjoukon jäšenenä — voittua joukkokilpailuissa ta henkilökilpailušša jiähä voittajien lukuh. Joukkokilpailušša Venäjän piäjoukko varmah voitti toisen venäläisen ta valkovenäläisen joukon.
— Yksityiskilpailušša olima peräkkäin, enšimmäisellä paikalla olija šai 16 pistehtä, toisella — 15 ta mie — 14. Tuntu, jotta še oli tovellini taistelu. Finalissa, kyllä mie hermoššuin, kun oli niin äijän kaččojie ta še tunneh häiričči milma. Pualikka lenti kunne iče tahto, eikä kunne mie löin. Pitäy opaštuo vielä peluamah kiinittämättä huomijuo minnekänä paičči kenttyä ta omua pelie, lisäsi Žanna.
MM-kilpailuh tulluot kuuvven muan urheilijat šekä yhissetyn gorodki-joukkovehen etuštajat koroššettih, kuin hyvät olot oli tarjottu kilpailijilla. Klassista, europpalaista ta šuomelaista gorodki-pelie varoin oli valmissettu eri kentät.
— Mie šanoin tätä netälie, kumpasen vietin Priozerskissa kyykkä-parentolakši. Priozerskissa on korkietašoni gorodki-urheilukeškuš. Kuin hyvät tulokšet oltais, još harjotella šamanmoisella joka päivä, muhiu Žanna.
Enši gorodki-pelin MM-kilpailut pietäh kolme vuotta kuluttuo. Šinne Žanna kučutah, još hiän rupieu aktiivisešti ošallistumah eri tašan kilpauluih ta näyttämäh tätä parempie tulokšie.
Lisyä lukekkua Oma Mua -lehen tuorehešta numerošta ta Karjalan Sanomista.