Kut matkata vanhoile ristituile kebnemba?
”Kebn turizm vanhoiden ristituiden täht”-projektan ezmäižed ühtnikad tuleskeliba Šoutjärvehe Ladvaspäi ezmäižen kerdan. Pensioneroiden täht oli vedetud ekskursii Šoutjärven muzejas. Eksursijan jäl'ghe uded turistad käveliba jaugai külädme. Ühtes kändajanke pensiimehed oleskeliba Iona Jašjärvelaižen monastiriš. Sid' tetab Vepsän rahvahan hor lahjoiči adivoile ičeze pajoid.
— Om jüged vedäda ekskursijad, konz om äi rahvast, siks ku sinei pidab ectä, mi om mel’he kaikile. Kaikuččele turistale pidab antta sijad, mahtta ozutada kaik predmetad da pidab pagišta hüvin, miše kaik voiba kulištada sindai, sanui Jevgenii Fotejev, Šoutjärven muzejan radnik.
Karjalas planuitas tehta enamb koumed kümned matknikoiden sebrad. Ned ühtenzoitaba läz tuhad pensionerad, kudambad oma vaumhed jatkta tedištada enamba Karjalan polhe. Projektan ohjandajad oma Socialižen turizman kehitoitusen keskusen radnikad.
