Kul’tuuran kehittämine: midä uuttu
Kandurahvahien kielien da kul’tuuran kehittämizen da säilyttämizen uvvet keinot oldih paginal Periodika-julguamos. Sen levon al olijas Karjalazien, vepsäläzien da suomelazien kielikeskukses 2. ligakuudu piettih ”pyöryžy stola”, kuduan nimekse oli pandu "Kandurahvahien yhteiskunnallizien yhtymyksien parahat praktiekat da alguhpanot”.
Pivos paginal oldih kaikis hyövyllizimmät keinot, kudamien vuoh säilytetäh da kehitetäh karjalan, vepsän da ven’an kielii da kul’tuurua Karjalan tazavallas.
Pivon vedäjänny oli Kanzallizen da alovehellizen ministerstvan ozaston piälikkö Jelena Migunova. Paginoin pidäjien keskes oli Vepsän kul’tursebran piälikkö Larisa Čirkova, Karjalan Rahvahan Liiton johtai Anna Jakovleva, Karjalan kul’tuuran Viena-etnokeskuksen piälikkö Julija Filippova da Kvartal-yhtymyksen piämies Mihail Tretjakov.
— Kieldy da kul’tuurua pidäy kehittiä da säilyttiä kogonažuksennu da eri keinoloin vuoh: kirjoin painamal, vepsänkielizien paginoin kirjuttamal, nygyaigazien sähköpalveluloin kehittämäl da luadimal. Vihjuan vie, ku sidä suurdu ruaduo pidäy ruadua suurel joukol, sanoi Oma Mediale vepsäläine Larisa Čirkova.
Karjalan Rahvahan Liiton piälikkö Anna Jakovleva kerdoi omassah järjestön projektois.
— Karjalazet perindöt teatrualaval -projektas opastimmo Teatrujoukkoloin piälikkölöi juuruttamah ozutuksih karjalan kieldy, perindölöi da taboi. Sen hantuzis piimmö kaksi festivualii — ”Karjalaine suarnu” lapsih niškoi da ”Piäroulis on Karjal” vahnembile. Painatutimmo paginsanakirjan teatrujoukkoloin rahvahile abuh. Kolmes piiris — Anuksen, Kalevalan da Louhen — piimmö karjalan kielen treningat. Rilsujem po-karel’ski -projektan tuloksennu luajimmo kymmene lyhytty videoroliekkua, kui oigieh sanuo karjalakse erähii sanoi, kui keksie karjalankieline nimi tavarale, brendale, palvelule, kui pidiä piäl karjalazii ruuttii, kerdoi Oma Mediale Anna Jakovleva.
Projektoin vuoh yhteiskunnallizet liitot voijah yhtistiä ennevahnazet perindöt da nygözen aijan, panna yhteh ruadamah eri sugupolvien da ammattiloin rahvastu perindöllizen kul’tuuran da kielen säilyttämizekse.
Yhty Oman Median kanualah MAX:as!
