Kuki-rikku: viijes vuvves 30 s’užiettua karjalakse da vepsäkse
Karjalan kanzoin ystävyskois pietäh uuzien jumoristizen Kuki-rikku-žurnualan videoloin prezentatsii. Talvikuun 9. päivänny 17.00 čuasun aigah pidoh kerävyy lastu, kuduat oldih artistoinnu uuzis videolois, heijän ystävii, vahnembii da opastajii. Kuki-rikku-projektan joukko valmisti pidoh tulijoih niškoi suuren programman.
— Ostimmo meijän nuorile artistoile pienet lahjat, valmistimmo pruazniekkuprogramman, kuduan aigah rubiemmo kižuamahgi. Jälles kaikin yhtes juommo čuajuu da syömmö magiedu, sanoi Oma Mediale Galina Baburova, Kuki-rikku-projektan eräs piälikkölöis.
Periodikan piän al da Kanzalližuksien azieloin federuallizen agenstvan varoil viijetty vuottu valmistetah pienii jumoristizii videoloi karjalan da vepsän kielil. Viijes vuvves on luajittu 10 noumerua, jogahizes on kolmin videoloin.
— Täs aijas on kerävynnyh kogonaine artistoin arteli. On mostu lastu, kudamii ei yhty kerdua kuvattih videolois. Hyö jo kazvettih, ruavastuttih. Erähii ni tuta ei sua. On mostugi, ket iče tuldih da pyrgevyttihes meijän projektah. Enne myö ečiimmö artistoi, nygöi hyö iče tullah, sanoi Galina Baburova.
Tänä vuon Kuki-rikku-projektan joukko pidi kilvan, kuduas vallittih videoloin parahii lapsien kirjutettuloi stsenaarieloi. Kaksi mostu uuttu s’užiettua ozutetah prezentatsies tossargen.
Aihies voit lugie suomeksegi.
Yhty Oman Median kanualah Telegramas!
