Karjalakši pakasijat lapšet tultih uušien Kuki-rikku-lähetykšien šarjojen näyttelijiksi. Nellä videota vanhempien ta lapšien välisistä šuhtehista ta hauskoista perehien tilantehista šuau nähä tämän vuuvven lopušša.
— Videoissa tahomma näyttyä huumorisešti, mimmosie tilantehie on vanhemman ta nuoremman šukupolven välissä. Kuin törmätäh toini toiseh lapšien ta vanhempien harraššukšet, šano projektin johtaja Marija Šašina.
Uušien šarjojen kuvaukšet piettih Petroskoissa ta Vieljärveššä. Petroskoissa kuvattih videoita vienakši ta Vieljärveššä livviksi.
— Enšimmäistä kertua projektih ošallissuttih lapšet Priäžän piiristä. Hyö tultih käymäh yhteh muasteri-oppih, a kuvuamah myö läksimä šinne. On huomattava kielitaijon ero, šentäh kun Vieljärven alkeiskoululaiset ollah Karjalan kielen kojin kielipešän piäštökkähät ta opaššutah kieltä koulušša, lisäsi Marija Šašina.
— Tänä vuotena kuvaukšet mäntih rutompah, šentäh kun kuvaukših ošallissuttih lapšet, kumpasien kielineroja on parempi. Viime vuotena oli vaikeukšie, šentäh kun lapšet viärin iänettih karjalankielisie šanoja, šelitti projektin ohjuaja Julija Potahina.
Ennein kuvaukšie lapšien kera piettih harjotteluja. Niijen vetäjänä oli teatteriohjuaja Darja Grečana. Projektih otettih vain niitä lapšie, kellä oli himo ošallistuo kuvaukših ta kellä oli parempie kielineroja.
Talvikuušša valmissetah Kuki-rikku-ohjelman kakši lähetyštä, jokahisešša on kolme videota: livviksi, vienakši ta vepšäkši. Nyt kuvaušryhmä valmistautuu vepšänkielisien videojen kuvaukših.
Kuki-rikku-videošarjua luajitah Karjalan tašavallan karjalaisien, šuomelaisien ta vepšäläisien kieliresurssikeškukšen toiminnan rajoissa Karjalan kanšallisen ta alovehellisen politiikan ministerijön kannatukšella.