Petroskoiš tehtihe ”Parahim opendamiž-metodine material karjalan, vepsän da suomen kelel”-konkursan ühthevedoid. Ezmäižen sijan ”Parahim joukvestišton openduzmaterial karjalan, vepsän da suomen kelel”-nominacijas sai Karjalaižiden, vepsläižiden da suomalaižiden kel’keskuz ”Kuku-rikku”-projektas. Kaiked konkursas oli kuz’ nominacijad.
— Minä olen ihastusiš, miše meiden rad om tarbhaine. Lapsile oli mel’he olda artistoin, ühtneda sjomkoihe, a jäl’ges nägištada ičtaze tele-ekranoil. Vägestuz konkursas ozutab, miše ”Kuki-rikku”- videorolikad voiba olda ližamaterialan keliden openduses. I nece om lujas tärged azj meiden täht, sanub üks’ projektan tegijoišpäi Maria Šašina.
Johtutam, miše jumoristine videožurnal ”Kuki-rikku” oli kuvatud muloi Karjalan rahvahaližen da regionaližen politikan raha-abul. Siloi läksi kaks’ videožurnalan vipuskad vepsän kelel da karjalan kelen kahtel paginal, kaikuččes vipuskas om koume viedorolikad. Täl vodel projekt sai jatktandan.
”Parahim opendamiž-metodine material karjalan, vepsän da suomen kelel”-konkursan tegii om Karjalan opendusen kehitoitusen institut. Konkursaha ühtniba Karjalan školiden, lapsiden päivkodiden, ližaopendusen organizacijoiden, kundaližiden sebroiden da joukvestišton radnikad da ezitajad.