Ligakuun 1. päivänny kirjasto sai Kotkatjärven eläjän, karjalazen kirjuttajan da kiändäjän Zinaida Dubininan nimen. Panemah Zinaida Dubinan nimie kirjastole kuhkutti Kotkatjärven kylän administratsien piälimäine Nadežda Rubets.
– Olen hyväs mieles, ku kirjasto sai juuri Zinaida Dubininan nimen. Zinaida Timofejevna sen lunnasti, sanou kirjaston avajazih yhtynyh školan opastai Ol’ga Nikitina.
Kotkatjärven kirjasto uvvistettih Uvven polven kirjasto -projektan hantuzis: tiloin kohendusruadoloih, pertilomuloin, tiedokonehien da uuzien kniigoin ostandah annettih viizi mil’jounua rubl’ua. Projektan mugah kirjastoh, kudai on sijoitannuhes Kotkatjärven kul’tuurutaloih, suadih enämbi 3 000 uuttu kniigua da uvvistettih 90 prosentua kniigua lapsih niškoi.
– Uvvistettuh kirjastoh pandih nägövih karjalaine koloriittugi. Tilois roittih etnokirjoil čomendetut karjalankielizet nimilaudazet, sanou kirjaston ruadai Natalja Artemjeva.