Karjalan valdkundan Openduz- da sportministerstvan korktan pauklahjan ”Arvokaz opendai”-znaman sai Vepsän kul’tursebran aktivine ühtnik Svetlana Pas’ukova.
Äi vot Svetlana Petrovna Pas’ukova mülüi Karjalaižiden, vepsläižiden da suomalaižiden ištundaha Karjalan pämehen ohjandusel. Hän ühtes toižidenke aktivistoidenke tegi kaiken, miše vepsän kel’t zavottihe opeta Karjalan školiš. Hän ühtni karjalan da vepsän keliden kafedran, a mugažo Suomalaiž-ugrilaižen školan tegemižehe. Hänen abul äjad openikad saiba üläopendust Vengrias, Estonias, Moskvan da Piterin üläopištoiš. Svetlana Petrovna tegi suren panendan Karjalan opendusen da rahvahaližen politikan kehitoitusehe.
— Nece pauklahj oli varastamatoi minun täht. Olen ihastusiš, miše mugoine pauklahj tehtihe. Om mel’he sada sen mugoižes igäs, sikš ku tunded, miše radod, mittušt mö tegim, korktas arvostadihe. Kaiken elon minä abutin opendajile, školiden pämehile. Naprin tehta kaiken, miše meiden openduz oli korktal tasol. Toivon, miše necen pauklahjan saškaba äjad opendajad, kudambad äi vot radoiba küläškoliš, andoiba lapsile hüvid tedoid i openziba lapsid suomen, karjalan da vepsän kelihe. Hö tegiba suren panendan opendusehe, sanui Svetlana Petrovna.