Kondupohju: ozuttelu kerdou lyydinkarjalazis
Karjalan tiedokeskuksen ruadajien valmistettu ozuttelu on avattu Kondupohjan alovehen muzeis. Ozuttelun perustehekse roittih ainehistot da vehkehet, kuduat on kerätty samannimizen Vezimelliččy on karjalazen kylän merki -projektan aigah. Ozuttelun piäkohtannu on Käppisellän kylän muanruadajan Ivan Martinovan melličän pieni modeli, kudai on luajittu vuvven 1916 dokumentoin mugah. Melličän luajindas perindön mugah käytettih puudu eri luaduu — pedäjiä, kuustu da koivuu. Jauhinkivet on luajittu graniitas.
— Tärgei oli luadie moine melliččy, kuduan ozutteluh käyjät voidas panna ruadoh. Se on mieleh ruavahile da tiettäväine, lapsilegi, sanoi Meččyinstituutan tiedoruadai Vladimir Karpin Karjalan tiedokeskuksen lehtistöpalvelule.
Ozuttelu kerdou kogo Karjalan da Kondupohjan lohkon muanruadajien melličöis, niilöin ruandas, merkičykses muanruadajien elaijas da meijän ezi-ižien muailman mifolougizes nävös. Ozuttelus suau nähtä vahnanaigastu da nygöi luajittuu melličöin kuvua.
Projektan pidoloih kuuluttih opastusvastavukset lapsien da ruavahien kel, media-ainehiston valmistamine, Karjalan melličät -dokumentufil’man luadimine. Se suau nähtä projektan joukos VKontaktas.
Projektan aigah on kerätty 20 ozutusvehkehty — melličöin palua da mehanizmua. Eräs tärgevimis ozutusvehkehis on Jyrkänmägi-kylän lähäl löytty rataslavan pala. Sih huolimata, ku laba puolensadua vuottu oli vies, sit hyvin säilyttih puuhizet palat, metallušiipat da kehä.
Kondupohjan muzein da Karjalan tiedokeskuksen yhtes luajittu ozuttelu andoi mahton uvvistua ekspozitsii, kudai on omistettu lyydinkarjalazile. Ozuttelun jälles sih nähte luajittu melličän modeli jiäy Kondupohjan muzeile da tävvendäy sen taguzet.
Ozuttelu rubieu ruadamah syvyskuun loppuh suate.
