Komin tazavallas ozutetah Karjalas luajittuloi lyhytaigazii fil’moi
Tuivež-festivuali pietäh Siktivkaras jo seiččemetty kerdua. Tänävuon se omistetah Komin tazavallan 100-vuozipäiväle. Kilbah työnnettih 190 ilmoitustu Ven’an eri čuppuloispäi dai ulgomualpäi. Kilvan finualah piäzi 58 ruaduo, kudamien joukos ongi Valgien kodine -stuudien kaksi mul’tfil’mua: “Kyykkä” karjalan kielel da “Kärbäzet” ven’an kielel.
Kyykkä -tyttimul’tfil’mas kerrotah, kui oigieh kižata karjalazien perindöllizeh kižah, Kiärbäzet-mul’tfil’mas kerrotah plastiliinas luajitun Son’ka-koiran šeikkailulois.
— Meijän stuudii alalleh yhtyy festivualih da suau palkindoloi. Voiton jo sai Buaballuo goštis -karjalankieline mul’tfil’mu, diploman sai Tipaine da Tippuine -mul’tfil’mu. Pidäy sanuo, ku kilvas on äijy hyväluadustu ruaduo, sanoi Oleg Obnosov.
Kilvan finualah piäzi karjalankieline Tuulen selläs -dokumentufil’mugi, kuduan ohjuajannu on Oleg Obnosov. Fil’mas kerrotah karjalazen naizen elaijas. Piähengen roulis on Nina Mohnačova, s’užietan pohjas on jessoil’čan Svetlana Vsevolodovan mustelmii lapsusaijas.
Festivualin finualah piässyöt fil’mat voibi kaččuo Siktivkaras 14.-17. syvyskuudu. Silloigi sanotah voittajien nimet.
