Kolatsellän mraamorua Isaakien kirikön kunnostamizekse
Jo tänä keviän Kolatsellän lähevil ruvetah kaivamah mraamorua. Louhos sijoittuu Kovatjärvi-kohtas, kudai on seiččemen kilometrin peräs kyläspäi luodehehpäi. Prionežskaja gornaja kompanija -laitoksen suaduu mraamorua ruvetah käyttämäh Sankt-Peterburgan Isaakien kirikön kunnostamizekse.
— Mraamoran louhuamine äijän merkiččöy Karjalale da kogo Ven’an luodehele. Meile jo ozutettih kivien värikkähyön, erähii materjualoi voibi käyttiä niilöi objektoi kunnostajes, kudamii luajittih Ruskealan mraamoras, sanoi Karjalan piämies Artur Parfenčikov omale lehtistöpalvelule.
Laitos rubieu valmistamah mraamorulohkoloi - da laudazii, louhuamah mraamorua kaheksua eri värii, niilöin luvus moinegi, kudai on ihan Ruskealan kiven moine.
Prionežskaja gornaja kompanija -laitos luadi Pitkäsrannas ozaston, kuduas ruvetah silendämäh da pakkuamah mraamorua. Projektah pannah enämbän 545 miljounua rubl’ua, Prionežskaja gornaja kompanija -laitos luadiu enämbän 100 ruadosijua.
Karjalan tazavallan piämies Artur Parfenčikov käski auttua Prionežskaja gornaja kompanija -laitostu tiloin suurendamizes uuzien ruadokohtien luadimizekse. Karjalan halličus sežo auttau sähkön da guazun suamizes.
Aihies voit lugie suomeksegi.
