”Kodima”-lehtesen redakcii tegeb regionoidenkeskeižen fotokonkursan ”Kodikülä – kal’hed ristitud”. Konkurs vedetas Vepsän kul’tursebran ” Kel’ – minun Kodima”-projektan aigan, mitte sai Karjalan pämehen grantan.
Konkursas om kaks’ nominacijad: ”Kodikülä” da ”Heledad henged”. Ezmäižehe nominacijaha voib oigeta vepsläižiden küliden kuvid (pertid, londuzkivid, irdoid), toižehe – vepsläižiden ristituiden modkuvid. Konkursaha voiba ühteta eri-igän mehed.
— Idei tehta mugoižen konkursan meil sündui amu. Mö tahtoim ei vaiše sündutada ristituiš melentartust ičeze penehe kodimaha, no mugažo tehta fotobank, miše kävutada nenid fotoid lehteses da ”Oma media”-portalal, sanub ”Kodima”-lehtesen pätoimitai Irina Sotnikova.
Parahimiden fotokuviden pohjal tehtas kalendar’ vepsläižidenke külidenke 2024. vodeks, a ”Periodika”-paindištos – ”Heledad henged”-foto-ozuteluz.
Fotokonkurs om tehtud ”Kodima”-lehtesen 30-voččeks jubilejaks. Kuvid voib oigeta adresadme 31.päivähasai elokud.
Ližatedoid voib löuta täs.