KniiguMelliččy pyöriy ‒ uutta lukemista tuou

KniiguMelliččy keräsi Periodika-kuštantamon kirjojen yštävie. Kuva: Uljana Tikkanen

Periodika-kuštantamo esitti vuotena 2022 julkaistuja kirjoja Karjalan yštävyštalon salissa.

Vuotena 2022 Periodika-kuštantamo valmisti 14 kirjua. Še on “Periodikan” omie kuštannušprojektija, kirjat, kumpaset julkaistih projektien rajoissa tahi kirjat, kumpaset valmissettih Karjalan kanšallisen ta alovehellisen politiikan ministerijön tilaukšella.

― Viime vuotena kauno-, opaššuš- ta lapšikirjallisuon lisäkši “Periodika” valmisti nellä “Kalevalua”. Myö julkaisima Aleksandra Lubarskajan kiäntämän “Kalevalan” lapšilla, šitä kaikešta enemmän luvetah Karjalašša. Niise on merkittävä Kalevalan julkaisu vepšäksi, eepossan kiänti Nina Zaitseva šekä Dmitrii Dmitrijevin kakši “Runotarinua lapšilla”, šano Periodika-kuštantamon johtaja Natalja Sinitskaja.

Kirjojen esittelyššä oli lyhyöšti kerrottu joka kirjašta. Eryähistä kirjoista šaneltih iče luatijat: Tatjana Boiko esitti uutta livvinkarjalan kieliopin šanakirjan, Valentina Mironova šaneli Pedri, kuulužu kuningas -kirjan šiämyššäštä. 

Kirjallisušillalla šai kuulla eryähien tekstien pätkie, kuin esimerkiksi Kalevalan runoja vepšäkši. 

Kirjaesittelyššä Karjalan kanšallisen ta alovehellisen ministerin šijähini Aleksandra Jeršova myönti kiäntäjällä ta toimittajalla Robert Kolomaisella ministerijön kunnivomerkin Karjalan tašavallan kehittämiseh panokšešta. Robert Kolomainen kiänti šuomelaisen matkuštajan Avgust Vil’gelm Ervastin matkakirjutukšie šuomen kieleštä venäjäkši. Tämä kirja niise näki päivänvalon viime vuotena. 

Lapšikirjallisuš-ošašša oli kerrottu Runotarinat-kirjašta, kummaista kaikešta rikenempäh oššetah kuštantamošta šekä Karjalan kanšojen starinat lapšilla -kirjašta, kumpasen valmisti Etnokulttuuriopaššukšen spesialisti Ol’ga Hramtsova. 

Kertomukšien lisäkši oli musiikkiesitykšie, KniiguMelliččy-illalla šoitettih kantelehella, pillillä, pianolla ta kitaralla, šekä laulettih karjalakši ta vepsäkši.

Periodikan spesialistit ošatah hienošti tuntie kirjan luatijua, šentäh ni kirjat tullah šuosituiksi lapšien ta aikuhisien kešen.

Aihiešta voit lukie niise venäjäkši.

Natalja Sinitskaja: “Kiitän kaikkie, ket tultih meijän luovah iltah, ket otettih ošua kirjojen valmistamiseh. Toivon, jotta kirjoja tulou vielä enemmän.” Kuva: Uljana Tikkanen

Viime vuotena “Periodikašša” päivänvalkien näki 14 kirjua. Kuva: Uljana Tikkanen

Robert Kolomainen: “Konša mie kiännin Ervastin matkamuisselmie mie ajattelin, voinko mie šemmosešta matašta näin kirjuttua? En voinun. Kuin tarkašti hiän huomasi karjalaisien elämän yksityisošie.” Kuva: Uljana Tikkanen

Ol’ga Hramtsova: “Kokomukšešša on viisi starinua, ka valita niitä oli ylen vaikie. Mie lapšena en luken niin äijän kirjua, kuinka luvin julkaisun valmistamisen aikana.” Kuva: Uljana Tikkanen