“Kipinä” vuottau kešyä ta valmistautuu merkkipäiväkši
Kuvalehen šivuja šelaillen šie löyvät Kučču Kanarvočäijyllä -starinan toisen ošan ta opaššut valistamah makieta parfe-jälkiruokua manšikašta, luvet runoja muajilman luatimisešta ta ajatukšellisešta pallošta, šuat tietyä mitein karjalaiset varuššettih heinyä šekä äijän mukavua kuklojen muotista. Šen lisäkši “Kipinäššä” on mukavie šanarissikköjä ta tehtävie kešäštä, piiruššukšie šekä Äijänkö kello on?- ta Piikikäš vieraš -harjotukšie.
Kipinä-kuvalehen kakši šuurta artikkelie on omissettu Vesläžed-kollektiivin 20-merkkipäivällä šekä Karjalan ratijon toimittajilla.
– Vuuvven alušša kuvaleheššä oli ilmotettu “Kipinän” 35-vuotispäivällä omissettu Onnittelukortti-kilpailu. Uuvven lehen korissukšena ollah enšimmäiset “Kipinäh” työnnetyt onnittelukortit. Šie vielä kerkiet ošallistuo kilpailuh! Piirušša oma onnittelukortti ta lähetä še Kipinä-lehen toimitukšeh 01. šyyškuuta šuaten. Parahat onnittelukortit palkitah ta julkaissah leheššä ta “Kipinän” nettišivulla, koroštau kuvalehen toimittaja Ol’ga Smotrova.
