Kuvalehen šivuja šelaillen šie löyvät Skokku-Skokuna läksi muailmalla -starinan enšimmäisen ošan ta opaššut šoittamah kantelella, luvet runoja kevyäštä ta viisahašta hiireštä, šuat tietyä mitein karjalaiset varuššettih horšmačäijyö, käytih Šuomeh laukunkantajina šekä kalaššettih. Šen lisäkši “Kipinäššä” on mukava loto-peli ta tehtävie kešäštä, piiruššukšie šekä Kusbo on parembi eliä- ta Matkuštamini juhlallista Karjalua myöten -juttuja.
– Vuuvven alušša kuvaleheššä oli ilmotettu Ole hyvä, ole terveh -kilpailu. Uuvvešša leheššä on esitetty enšimmäisie “Kipinäh” työnnettyjä kilpailuruatoja tervehyöštä ta urheilušta. Šie niise vielä kerkiet ošallistuo kilpailuh! Lähetä aihien mukasie runoja, kertomukšie, piiruššukšie tai valokuvie Kipinä-lehen toimitukšeh 30. šyyškuuta šuaten. Parahat työt palkitah ta julkaissah leheššä ta “Kipinän” nettišivulla, koroštau kuvalehen toimittaja Ol’ga Smotrova.