“Kipinä” vuottau kešyä
Voipiko opaštuo karjalua leikiten? Mitein paperikoira voit auttua piäntätä piäh runon? Vaštaukšet näih kyšymykših šie löyvät verekšeštä “Kipinäštä”.
Kuvalehen šivuja šeluallen šie luvet taiteilijan Dmitrii Dmitrijevin runostarinoja ta Sergei Georgijevin “Ilmarin starinoja”. Vienalaisen Lidija Torvisen mukava kertomuš tuttavuštau šilma viisahan variksen temppuloih, a Baltazar L’ubovin, Nikolai Dubalovin ta L’udmila Gromovan kaunehet runot lahjotetah kešätunnelmua.
“Kipinän” parissa šie opaššut luatimah maitošuppie manšikan kera, a Valentina Mironovan artikkelista šuat tietyä, jotta omua mökkie parempua mitänä ei ole.
— Kuvalehen uuvvešša numerošša on hyvin äijän erilaisie tehtävie: Meritaistelu-peli, šanarissikköjä, aivopähkinöjä, värityškuvie. A stolakisojen tykkyäjät löyvetäh hyvin tunnettu Memo-kisa vienakši ta livviksi. Šiihi vaššen vuuvven oloh kuvalehen toimittajat aina lisätäh uušie korttija. Keryä ne kaikki yhteh, näin täštä kisašta šuat mukavan homman kotijoukolla tahi kaverien kera ajan vietokši, on varma “Kipinän” toimittaja Ol’ga Smotrova.
Hyvyä matkua uuših šeikkailuih “Kipinän” kera!
