”Kipinä”-kulehtez om adivoiš vepsläižiš školiš
Tämbei 21 vilukud ”Kipinä”-kulehtesen toimitajad oliba adivoiš Kalagen da Šoutjärven školiš, miččed seižuba Änižröunas. Lapsed lugeba ”Kipinäd” vepsän kelen urokoil, sikš oli melentartušt tedištada, kut tehtas meiden žurnal, da ken radab žurnalan redakcijas.
Kalagen školan 4.—5.-klassoiden openikad ozutiba, miše hö tedaba vepsän kel’t hüvin, vändiba ühtes vepsläižehe ”Nürkuižed”-vändoho. Šoutjärven školan 2.klassan openikad mugažo vändiba aktivižesti da paniba muštho völ erasid uzid sanoid vepsän kelel.
― Kaik mänetiba aigad hüvin. Lapsed ozutiba ičeze kel’mahtoid, hüvin vändiba da vastsiba küzundoihe, sanub ”Kipinä”-kulehtesen pätoimitai Jana Filimonkova.
Školiden vepsän kelen opendajad da žurnalan radnikad pagižiba ühthižrados tulijas aigas. Om äi planoid da idejoid, miše libutada lapsiden tahtod opendamha vepsän kel’t edemba-ki.
