”Kiži”-muzei starinoičeb vön peitväges
”Kiži”-muzei starinoičeb vön peitväges. Ozutelusel, miččen nimi om ”Vön peitoline vägi”, vob tedištada, kut tehtihe vöid, kut vösttihe sil, kut kävutoittihe vöid veroiš. Ende lugetihe, miše vö ei ole vaiše sädon pala, no om erazvuiččiden veroiden simvol-ki. Se kaiči tervhut da toi hüvüt ristituile kogonaižen elon laps’aigaspäi surmahasai. Neche ozutelusehe mugažo mülüi 20 vöd kirjutesidenke keradajan Maksim Maksimovan personaližes keradamištospäi. Ned oma lujas harvinaižed da arvokahad.
— ”Kiži”-muzejas jo koumanden kerdan ozutadas eksponatoid minun keradamištospäi. Olen ozakaz mugoižele ühthižradole. Necil kerdal ozutelusel oma minun keradamišton vöd Altajan Vologdan, Kirovan, Nižnii Novgorodan agjoišpäi, sanui Maksim Maksimov.
Tradicii čomitada vöid kirjutesil sanub rahvahan da ortodoksižen kul’turiden ühtenzoituses. Vöiš oma Jumalale oigetud sanoid, loičendoid, psalmoiden tekstpalaižid. Spasiboičendaks ühthižrados Maksim Maksimov lahjoiči muzejale Kargopolin podzoran kirjutesenke ”Lahjoičen sille, keda armastan”.
Paiči ekskursijad ozutelustme kaikutte tahtnik voib ühtneda vön tegemižen kursaha. ”Vön peitoline vägi”-ozuteluz radaškab semendkun lophusai.
