Lehtesen lehtpolil voib löuta erazvuiččid melentartuižid tekstoid keväden temale eri-igäižiden lapsiden täht. Udes nomeras om paindud Jevgenii Pekkin ”Reboi da il’bez”-sarnan jatktand. Täl kerdal vepsläižes sarnas lugijad tedištaba, kut Il’bez kadoti händan i mikš hö nügüd’ Reboinke oma vihanikd.
Keväz’ om čoma, no ühten aigan om varukaz-ki voden aig. Kut pidab vedäda ičtaze kevädel, mikš tarbiž olda tarkan kävudes läheli pertid da uitoid, voib lugeda udes vepsänkeližes nomeras.
– Kut kaiken-ki mö naprim kerata meiden lehtesehe uzid melentartuižid materialoid da harjoitusid, uzid mastar’-klassoid. Nacein, kaikutte mez’ laps’aigal pästli vedele laivaižid kevädel. Mö ozutam meiden lugijoile kut kebnas da heredas voib tehta mugoine laivaine. Ozutim mugažo, kut kebnas voib pirtta čomid änikoid mujuiden da nitiden abul. Udes nomeras voib löuta kaikenaigaižid-ki rubrikoid. Täl kerdal ”Čoma vepsän ma”- rubrikas tundištoitam Šondjal-külänke, – sanub üks’ Kipinän vepsänkeližen nomeran keradajišpäi Galina Baburova.
Necil vodel Kipinäle täudub 35 vot. Lehtesen lehtpolil voib nägištada arhivaspäi ottud materialoid. Mugažo lehtesen toimitajad johtutaba jubileikonkursas da kucuba kaikid tahtnikoid ühtneda sihe.