Karjalazien valattamizen 800-vuozipäiväkse valmistetah ozutus
Karjalan piämies Artur Parfenčikov käski tazavallan kul’tuuruministerstvale valmistua ozutus karjalazien valattamizen 800-vuozipäiväkse. Sih ruadoh yhtytäh tazavallan teatrujoukot da Sordavalan histourielline puusto ”Bastion”.
Sordavalas ruadomatkas olles Karjalan tazavallan piämies kävyi Bastion-puustoh.
— Bastion-puustoh puaksuh kävväh sordavalalazet školaniekat da pienembät lapset. Tiä heile ozutetah ”Elävän histourien urokkoi”. Paiči sepän neruo heile ozutetah kuvondua da keraamiekan käziruaduo. Lapsil on hyvä mahto opastuo histouriedu ei vaigu kirjoin vuoh, ga nähtä sidä, kui elettih da midä ruattih ennevahnas, kerdoi Artur Parfenčikov omassah VKontakte sivul.
Sordavalan ”Bastion” on avattu vuvven 2018 lopus. Sinne kävyjät voijah ottua kädeh ozutusvehkehii, panna piäle histouriellizii ruuttii, lykkie keijähii da kirvehii, ambuo joustu.
Vuvvekse 2027, karjalazien valattamizen 800-vuozipäiväkse valmistettavien pidoloin joukos paginal olii ozutus rubieu kuulumah suureh pluanah, kuduan valmisti Ven’an kul’tuuruministerstvu da Karjalan haldivo merkipäivän kunnivokse.
