Karjalas voib sada “Matknikan pasportan”
“Matknikan pasport” om Karjalan Valdkundan Matknikoiden tedotelendkeskusen uz’ projekt, miččen päidei om tehta tundištoituz Karjalanke melentartuižembaks da ližakahambaks. Siš tedotadas Keskusen oficialižel VKontakte-lehtpolel.
Mugoižen pasportan abul om kebnemba kävuda melentartuisijoihe: kaikuččes kävundas matknikad saba stikeran, mitte tartutoittas matkoiden kartale. Sen ližaks pasportas oma “Tariž kacta” -lehtpoled, mi om ani tarbhaine mahtokahatomale matknikale da tegeb matkaspäi vändon. Pasport andab ristitule voimusen kävutada eriližid taričendoid, a mugažo paremboid oloid organizacijoil-partn’oroilpäi.
– Ezmäižin “Matknikan pasportad” saiba Belorussian Ezmäižen tedotelendkanalan žurnalistad, kudambad tuliba Karjalaha 3. semendkud ühtes oficialižen delegacijanke. Om čoma, miše projekt zavodihe muga, sikš ku Karjalan da Belorussian keskes om vahvoid kul’turižid da turistkosketusid. Kaiken ližaks nügüd’ om tehtud uz’ matklendimen ajeluz Petroskoin da Minskan keskes i belorusoile om völ kebnemb tundištadas Karjalanke, tedotadas Keskusen VKontakte-lehtpolel.
“Matknikan pasportan” voib sada radpäivil Valdkundan Matknikoiden tedotelendkeskuses (Petroskoi-lidn, Sverdlovan ird, 8) 9:00 časuspäi 17:00 časuhusai.
Uzišt neciš temas voib lugeda mugažo suomeks.
Tarkištele "Oma Median" MAX-kanalad!
